ლარს ოლსონის აბსოლუტი

გასულ საუკუნეში, შვედეთის ღარიბ სოფელში ლარს ოლსონი დაიბადა. ლარსი ბავშვობიდან კომერციული ალღოთი გამოირჩეოდა. 11 წლის იყო მუშაობა რომ დაიწყო და 15 წლის ასაკში მსხვილ მაღაზიაში მთავარი გამყიდველი გახდა. მას შემდეგ, რაც ლარსს და მაღაზიის მფლობელს შორის კონფლიქტური სიტუაცია წარმოიშვა, მან მაღაზია დატოვა, საკუთარი სავაჭრო ობიექტი გახსნა და კლიენტები თავისთან წაიყვანა. 1878 წელს, ლარსმა ”აბსოლუტ რენდ რენდვინგ”-ის მარკით არაყი გამოუშვა. მარკა ქართულად ითარგმნება როგორც "აბსოლუტურად სუფთა არაყი". ოფიციალურმა მთავრობამ გადაწყვიტა ლარსი ბაზრიდან მოეშორებინა და ამ მიზნით, სტოკჰოლმში მისი კომპანიის არსებობისთვის მიუღებელი პირობები შემოიღო. ამაზე მეწარმემ მსხვილი მარკეტინგული სვლით უპასუხა. მან თავისი მაღაზიები ქალაქთან ახლოს მდებარე კუნძულზე გადაიტანა. ააგო ნავმისადგომი, დაიქირავა ნავები და მენავეები, რომელთაც უფასოდ გადაჰყავდათ ის მგზავრები, რომელთაც მისი არყის დაგემოვნება ან შეძენა სურდათ. "აბსოლუტი" მარცვლისგან უძველესი შვედური რეცეპტით დამზადებული არაყი გახლავთ, რომელიც ქვეყნის გარკვეულ ნაწილში მოჰყავთ. თავის დროზე ეს პროდუქტი ამერიკის შეერთებულ შტატებში ექსპორტისთვის შეიქმნა. კლასიკური "აბსოლუტის" ალკოჰოლური სიმაგრე 40-45%-ს შეადგენს. ლარს ოლსონ სმიტმა მოიგონა სასმელის გაწმენდის საუცხოო მეთოდი ე.წ. რექტიფიკაცია, რომელიც დღემდე გამოიყენება. "აბსოლუტის" ყველა ბოთლს მისი გამომგონებლის ლარს ოლსონ სმიტის პორტრეტი ამშვენებს.

წყარო: avtoradio.ge