გლინტვეინი

ზამთრის ყველაზე ავდრიან დღესაც კი დღესასწაულად აქცევს არომატული  აალებული ღვინო, ანუ გლინტვეინი. ეს ცხელი სასმელი შეუცვლელია შემოდგომის და ზამთრის გრძელ ცივ ღამეებში. იყო დრო, როცა მას ჰიპოკრატეს სასმელს ეძახდნენ. არ ჩათვალოთ თითქოსდა უპირველესი მოხუცი ექიმი სწორედ მასზე იფიცებდა, რომ ზიანს არ მიაყენებდა პაციენტს, არა, უბრალოდ იმ დროს ღვინო გაცილებით სუფთა სასმელი იყო, ვიდრე წყალი და გლინტვეინი შეუცვლელი გახლდათ სამედიცინო მიზნებისთვის. ამ სასმელის გარეშე წარმოუდგენელია გერმანული საშობაო სუფრა, გლინტევეინი იქ ამ დღეს ისეთივე მნიშვნელოვანია, ჩვენში როგორც გოზინაყი ან საცივი. გლინტვეინს ვიქტორიანულ ინგლისშიც დიდი პატივს მიაგებდნენ. იმ დროს მისი ნაირსახეობა ნეგუსი საბავშვო დღესასწაულებზეც კი გამოჰქონდათ. სამწუხაროდ, ისტორიამ არ შემოინახა იმ ადამიანის სახელი ვისაც პირველს მოუვიდა თავში აზრად ცხელ ღვინოში ხილისა და სანელებლების ჩამატება. როგორც ამბობენ, კარგმა გლინტვეინმა მარტო სხეული კი არა, გულიც უნდა გაგითბოს, ასეთი კარგი გლინტვეინის მოსამზადებლად საჭიროა წითელი მშრალი ან ნახევრად მშრალი ღვინო, არჩვეულებრივია ხვანჭკარა, ქინძმარაული, კაგორი, კაბერნე. რაც შეეხება სანელებლებს, თავმოყვარე გლინტვეინი წარმოუდგენელია მიხაკისა და დარიჩინის გარეშე, დანარჩენი თქვენს სურვილსა და გემოვნებაზეა. შეგიძლიათ დაამატოთ თაფლი, კოჭა, ლიმონის ან ფორთოხლის კანი. გლინტვეინის მომზადებისას მთავარია ღვინო არავითარ შემთხვევაში არ აადუღოთ, თორემ ამ სასმელს საერთო აღარაფერი ექნება გლინტვეინთან. სუფრაზე აუცილებად მაღალი და გამჭვირვალე  ჭიქებით გამოაქვთ, რათა სასმელი ძნელად გაცივდეს და მისი ფერითაც შესძლონ დატკბობა. გლინტვეინის დიდძალი რაოდენობით დალევა შეიძლება სავალალოდ დასრულდეს, ამიტომ ერთ საღამოს ორ ჭიქაზე მეტის დალევა არ ღირს. ამ ნაზი გემოს სამელს აყოლებენ ვაშლის, ან ქლიავის არც თუ ტკბილ ღვეზელს, ხილსა და ყველს.

წყარო: avtoradio.ge