კუპატი თბილისურად

მასალა:

ღორის ნაწლავები 200გრ.

ქონი 6 ს/კ.

ხახვი 3 თავი

ბროწეულის წვენი 1/3 ჭიქა

ბროწეულის მარცვლები 1 ჭიქა

ქინძი გასაფორმებლად.

ფარში:

საქონლის ხორცი (რბილობი) 200გრ.

ღორის ხორცი (რბილობი) 200გრ.

სალა 100გრ.

ხახვი 2–3 თავი

ნიორი 2 კბილი

ქინძი 50გრ.

წითელი მშრალი ღვინო 100მლ.

კოწახური 3/4 ჭიქა

ხმელი ქინძი 1/2 ჩ/კ.

დარიჩინი 1/4 ჩ/კ.

მიხაკი 1/4 ჩ/კ.

მუსკატის კაკალი ცოტა

შავი პილპილი და მარილი გემოვნებით.

მომზადება:

ფარშისათვის ხორცი და სალა გავატაროთ ხორცსაკეპმანქანაში ხახვთან, ნიორთან და ქინძთან ერთად, დავამატოთ ღვინო, ხმელი ქინძი, დარიჩინი, მიხაკი, მუსკატის კაკალი, შავი პილპილი, მარილი, კარგად ავურიოთ, შემდეგ შევურიოთ კოწახური და კვლავ ავურიოთ. ნაწლავები კარგად გავრეცხოთ გამდინარე წყალში, მოვაჭრათ 25–26სმ. სიგრძის ნაჭერი, ერთი ბოლო კარგად შევუკრათ მაგარი ძაფით და ამოვავსოთ მომზადებული ფარშით (კარგად უნდა დავპრესოთ), ამოვსების შემდეგ მოვუკრათ თავი ძაფით და ორივე ბოლო შევკრათ ერთად. ასევე გავაკეთოთ დანარჩენი კუპატები.

კუპატები ჩავდოთ ადუღებულ წყალში 1 წუთით, შემდეგ გავამშრალოთ სალფეთქით და დიდი ნემსით ჩავჩხვლიტოთ 2–3 ადგილას. კუპატები დავაწყოთ გაცხელებულ ქონწასმულ ტაფაზე და შევწვათ ორივე მხრიდან თავსახურის გარეშე. მომზადების შემდეგ გადმოვიღოთ თეფშზე მოვასხათ ბროწეულის წვენი, მოვაყაროთ ბროწეულის მარცვლები, მრგვალად დაჭრილი ხახვი და გავაფორმოთ ქინძით.